1. Bedieningshefoom – word gebruik om die stroom per hand te onderbreek en die stroombreker terug te stel. Dui ook die stand van die stroombreker aan (aan of af/uitgeklink). Die meeste brekers is so ontwerp dat hulle nog kan uitklink al word die hefoom vasgehou of in die “aan”-stand gesluit. Dit word soms “vry uitklinkbedryf” of “positiewe uitklinkbedryf” genoem.
2. Aktiveringsmeganisme – druk die kontakpunte teen of uit mekaar.
3. Kontakpunte – laat stroom deur as hulle toe is en onderbreek stroom as hulle oop is
4. Aansluiters 5. Bimetaalstrook 6. Stelskroef – hiermee stel die vervaardiger die toestel se uitklinkstroom presies in na vervaardiging
Figuur 7.8: Termies-magnetiese stroombrekers Aardlekbeveiliging
Om die begrip agter die aardlekeenheid te verstaan, kyk ons eers na ’n driepenprop. Daar is drie drade wat die prop binnegaan, soms net twee. Om enige elektriese toestel te laat werk, moet dit met die lewendige en die neutrale toevoer verbind wees. As jy die neutrale geleier ontkoppel, sal die toestel nie werk nie, al is daar krag op die lewendige draad. Dit is omdat ons ’n oop of onderbroke stroombaan het – die stroom kan nie deur die neutrale lyn terugvloei nie. Ons het dus twee drade nodig om die stroom te laat vloei en dis bloot logies om die gevolgtrekking te maak dat die hoeveelheid stroom wat langs die lewendige lyn vloei, presies net so groot moet wees soos die stroom wat langs die neutrale lyn terugvloei. ’n Mens sou reken dis vanselfsprekend en in ’n ronde elektriese stroombaan is dit korrek, maar sodra daar ’n mens ter sprake kom, het jy ’n probleem.
Afgesien daarvan dat ons fisieke en psigologiese probleme het, het ons mense ook ander probleme – naamlik dat ons elektrisiteit gelei. Ons doen dit nie baie goed nie, maar ons liggaamlike elektriese weerstand is laag genoeg dat normale huishoudelike stroom daardeur kan vloei.
Om terug te kom na die stroombaan: Ons het ’n stroom wat met die lewendige draad langs kom, deur die elektriese toestel en terug deur die neutrale draad. Kom ons neem aan dat iemand die kabel na hierdie toestel beskadig het en dit probeer herstel sonder om die toestel se leiding te ontkoppel. Hy raak aan die lewendige draad en kry ’n skok. Hoekom? Omdat die stroom deur sy liggaam na die vloer waarop hy staan, lek (wat ons “aarde” noem). Het die stroom wat met die neutrale draad terugvloei, nog dieselfde waarde as die stroom wat deur die lewendige draad toegevoer word? Die antwoord is nee, want van die stroom het deur die persoon uit die stroombaan uitgelek na die aarde. Vandaar die uitdrukking “aardlek”.
Dink aan jou elektriese stroombaan as ’n tuinslang vol water. Iemand steek ’n gaaitjie daarin en veroorsaak ’n lekkasie. Vanweë die lek is die volume water wat by die pyp uitloop, nie dieselfde as wat daar invloei nie. ’n Eenvoudige analogie, maar dit help ons verstaan wat aangaan.
As ons nou ’n toestel sou hê wat die stroom in die lewendige draad akkuraat kon meet en dit dan deurlopend vergelyk met die stroom wat in die neutrale draad terugvloei, sou ons kon sien of daar ’n verskil tussen die twee is. Die toestel sou dan die krag afskakel. Dit sou voorkom dat Hansie Slim, wat nog steeds geskok word terwyl hy die koord regmaak, doodgeskok word.