Éist leis an dán ‘Jeaic ar Scoil’ le Dairena Ní Chinnéide. Ansin, léigh an dán os ard leis an duine atá in aice leat.
Jeaic ar Scoil le Dairena Ní Chinnéide
Glan díot gaineamh na trá Is oscail an doras don fhómhar, Bronn ort féin éide
Go bpriocfaidh sceacha na léine Do mhuineál óg beag
Is go dtógfar ón mbosca na bróga A mboladh leathair ina anlann agat. Tá’n tú sé mbliana d’aois.
D’aithníos le huaibhreacht do chrógacht Is tú ag déanamh ar stad an bhus. ‘Ná póg mé, Mam,’ a dúraís, ‘I’ll wait by myself.’
Chasas mo shála ar mo bháibín óg Go dtáinig fás aon oíche air Faoi cheobhrán brothallach na maidine.
Is shiúlaíos isteach abhaile Go dtugfainn leathshúil fén gcuirtín Go n-imeodh sé slán Go slogfadh an fhoghlaim é Le fiosracht tartmhar gan teorainn. Tá sé sé mbliana d’aois.
Gluais leat fé cheol Is fé ghrá do mhuintire. Feairín beag seanchríonna A chaith seal anso cheana Lena shúilibh donna Ar leathadh le hiontas As bheith beo sa tsaol.
