Ag deireadh na caibidle seo, déanfaimid staidéar ar an ngearrscéal ‘Quick Pick’. Léigh an sliocht gearr thíos agus cuir tús le do chuid machnaimh ar an ngearrscéal agus ar an topaic seo.
‘Beidh mé teannta san obair go dtí meán oíche.’ ‘Go dtí meán oíche? Ach cá bhfuil tú ag obair?’ ‘Anseo.’
‘Ach cá bhfuil … Ó!’
Chuir Aoife lámh lena béal. Bhí fáinne mór diamaint ar an lámh chéanna. D’amharc sí ar an scuab a bhí ina lámh i gcónaí ag Emmet. Leath a súile nuair a rith sé léi cad a bhí i gceist aige.
‘Anseo … sa siopa seo! Ó! Thuig mé gur ag ceannach na scuaibe sin a bhí tú! Ó, a Emmet. Bhí tusa ar an duine is fearr sa rang fisice. Shíl mé i gcónaí gur i saotharlann faoi rún daingean a bheifeá ag saothrú …
Sa scéal ‘Quick Pick’, úsáideann na príomhcharachtair a scileanna teicniúla chun obair mhímhacánta a dhéanamh.
Sa chaibidil seo, foghlaimeoimid go leor faoi phoist éagsúla agus faoi na scileanna a bhaineann leo. Céard iad na scileanna atá agat? Bunaithe ar do scileanna féin, cad iad na poist a bheidh oiriúnach duit?
Le linn na caibidle, déan machnamh ar na ceisteanna sin. Ag an deireadh, déan comparáid le daoine eile i do rang.
